Your browser doesn’t support HTML5
Тоьлла ши интеллигент вийра хIетахь Нохчийчохь...
1991 шарахь, Нохчийчоь егош яра хуьлучу хийцамех. Юккъараллин цхьа дакъа шовкъе даханера шайга кхача тарлучу маршонах. Кхечу декъанна, хIумма а диканиг хир ду аьлла а ца хетара, оцу хийцамех.
Оцу юккъехула Нохчийчохь сихонца шийла кхаъ баьржира, университетан ректор Кан-Калик Виктор лачкъийна, иза лачкъа ца вайта дуьхьалваьлла проректор Бислиев Iабдул-Хьамид вийна, аьлла.
Дерриг а хиллера университетан коьрта корпусна хьалха. Сарахь цIаваха араваьлла ректор Кан-Калик, герзхоша тIе а бевда, шайн машена чу хаон гIерташ гина, цунна тIаьхьа, жимма хьевелла араволучу Бислиев Iабдул-Хьамидна.
Иза сихонца тIе а ведда, накъост кIелхьарваккха гIоьртина. ХIара къарвала дагахь воцийла гича, цунна маса топ а тоьхна, лачкъийна ректор а эцна, дIабахнера зуламхой.
И де тахана санна дагадогIу Бислиев Iабдул-Хьамидца доттагIалла лелийначу Дадашев Райкомна.
Дадашев: «Оцу дийнахь со Iабдул-Хьамид волчохь, балха тIехь дуккха а къамелаш деш Iийра. Иза митингехь къамел а дина, чувеана а дукха хан яцара. Цигахь цо машаре кхайкхамаш бинера. Тхойшиъ къамел деш Iаш, Абхазера делегаци еъна аьлла хаам бира цуьнан секретара. Со чукхаьчча ах сахьт даьлча, соьга телефон туьхира, Кан-Калик дIаваьхьна, Iабдул-Хьамид вийна, аьлла. Со дарбан хIусаме вахара. ЦIий дукха дIаихина, иштта бакъ дуьнене дIавахара-кх Iабдул-Хьамид».
Лачкъийначу ректоран дакъа карийра 5 бутт баьлча Грозный кIоштахь. Иза ву аьлла даре а дина, цуьнан гергарчу наха дIаволлийтира иза Москохахь кешнашкахь. Ша ректоран дарже хIоттийча дуьйна дуккха а хиийцамаш бинера цо университетехь, керла ялх факультет йиллинера , Дадашев Райкома дийцарехь.
Дадашев: «Кан-Калик ша адамашца тарлуш стаг вара. Цхьанна а стагана новкъа вацара. Дуьйцу, кхаьънаш ца эцийта дуьхьалваьлла хилла бохуш. Иза шега далур доцийла иза кхетара.
Ша иза цхьа а гIаралхо а воцуш лелара. Со цуьнан цIахь а хилла Первомайски урамехь. Чуволучохь шайна луург дан йиш яра цунна зуламхойн. Ткъа нахана юккъехь, хьехархошка а, студенташка а маьхьарий а боьттуьйтуш дира и зулам. Иза динера, хьовсал, хIорш ю-кх хIорш и акхарой, аьлла йина цхьа политикан акци яра иза».
Бислиев Iабдул-Хьамид а, Кан-Калик Виктор а веро Нохчийчоь юьхьIаьржа хIоттийна ца Iаш, шен вон тIаьхье хир юйла оцу заманан, боху Дадашев Райкома.
Дадашев: «Нахана а, вайга ладугIучарна а хаийта лаьа суна. Университет йохийна яц. Иза ягна ю, бух тIера дуьйна, юхайина вай иза. Кегаренаш ца хиллехьара Iилманехь вай дикка гена девла хир дара аьлла хета, теша а лаьа хилла зен хенан йохалла меттахIуттур ду аьлла ».